Deputat Sumqayıtdakı ekoloji risklərlə bağlı xəbərdarlıq edib

Deputat Səbinə Salmanova Sumqayıtda sənaye tullantılarının Xəzər dənizinə axıdılması probleminin hələ də davam etdiyini bildirərək, ekoloji risklərin artdığı barədə xəbərdarlıq edib.

Salmanova Parlamentdə çıxışı zamanı Dövlət Su Ehtiyatları Agentliyinin bu il keçirdiyi yoxlamaların da vəziyyətin ciddi olduğunu təsdiqlədiyini deyib. Onun sözlərinə görə, kimyəvi maddələrlə çirklənmiş sular Xəzərin flora və faunasına zərər vurur, sahil boyu əhalinin dənizdən istifadəsini məhdudlaşdırır.

Deputat qeyd edib ki, Sumqayıtda Kotej qəsəbəsi istiqamətində yerləşən sutəmizləyici qurğu sutkada 200 min kubmetr suyu təmizləmək gücündə olsa da, bu potensial tam istifadə olunmur. Hazırda şəhərin 18 müxtəlif nöqtəsindən çirkab suların birbaşa Xəzərə axıdılması müşahidə olunur.

O bildirib ki, həmin axıntıların mövcud təmizləyici sistemə birləşdirilməsi böyük ekoloji risklərin qarşısını ala bilər. Salmanova sutəmizləyici infrastrukturun bərpası və genişləndirilməsi istiqamətində təcili tədbirlərin görülməsini təklif edib.

Onun fikrincə, bu addımlar həm Xəzər dənizinin mühafizəsinə, həm də Sumqayıt əhalisi üçün sağlam yaşayış mühitinin yaradılmasına xidmət edəcək.

Gülnar Nazimqızı