Azərbaycan elminin inkişafı üçün düzgün model seçməliyik - Vüsal Qasımlı

Azərbaycanın elmi inkişafı üçün düzgün modelləşdirmə aparılmalıdır və bunun üçün dünya təcrübəsindən yararlanmaq vacibdir. Bunu İqtisadi İslahatların Təhlili və Kommunikasiya Mərkəzinin rəhbəri Vüsal Qasımlı dəyirmi masada çıxışı zamanı bildirib.

Qasımlının sözlərinə görə, elmin davamlı inkişafı üçün dövlət və özəl sektorun birgə iştirakına əsaslanan yanaşma formalaşdırılmalıdır.

 O qeyd edib ki, bu məqsədlə Çin, ABŞ və İsrailin tətbiq etdiyi modellər Azərbaycana nümunə ola bilər.

O vurğulayıb ki, Çin və ABŞ-da universitetlərin innovasiya proseslərinə güclü inteqrasiyası mövcuddur, İsrail isə dövlət sifarişi və biznes strukturları ilə birgə elmi layihələri dəstəkləməklə seçilir.

“Hansı modeli istəyirik ki, elmimiz inkişaf etsin — bunu müəyyənləşdirməliyik. Özəl sektoru cəlb etməklə universitetləri prosesə daxil etmək olar. Dövlət sifarişi ilə. İsrail bu modelə yaxşı nümunədir”, — Qasımlı bildirib.

O əlavə edib ki, Azərbaycanın inkişaf potensialı böyükdür, və elmi mühitdə struktur yanaşmanın formalaşdırılması bu potensialın reallaşması üçün əsas şərtdir.

Gülnar Nazimqızı