Nazir: Azərbaycanda əməkhaqqı və pensiyalar əhəmiyyətli dərəcədə artıb

Azərbaycan əhalisinin sosial müdafiəsi, əmək və məşğulluq sahəsində geniş proqramlar həyata keçirilir, ölkədə dayanıqlı sosial müdafiə sistemi mövcuddur. Bunu əmək və əhalinin sosial müdafiə naziri Anar Əliyev Bakıda keçirilən Türk Dövlətləri Təşkilatının (TDT) əmək, məşğulluq və sosial müdafiə nazirlərinin birinci iclasında deyib.

Nazirin sözlərinə görə, son 6 ildə ölkədə 5 sosial islahat paketi qəbul olunub, bu islahatlar əhalinin 40%-ni əhatə edib və illik əlavə vəsait 4,5 milyard ABŞ dollarına bərabər olub.

Nəticədə minimum əməkhaqqı 3,1 dəfə, minimum pensiya 2,9 dəfə, orta aylıq pensiya 2,6 dəfə, sosial müavinət və təqaüd ödənişləri isə 5 dəfə artıb.

Əmək münasibətləri sahəsində işçilərin hüquqlarının qorunması, layiqli əməyin təmin olunması və qeyri-formal məşğulluğun qarşısının alınması əsas prioritetlərdir. Ölkə 59 Beynəlxalq Əmək Təşkilatı konvensiyasını və 1 protokolunu ratifikasiya edib, əlavə 4 konvensiyanın ratifikasiya imkanları araşdırılır.

Nazir həmçinin qeyd edib ki, qadınların əmək bazarına cəlb olunması üçün cinsi ayrı-seçkiliyin aradan qaldırılması üzrə tədbirlər aparılıb.

Formal məşğulluğun təşviqi nəticəsində əmək müqavilələrinin sayı 45% artıb, artımın böyük hissəsi özəl sektorda qeydə alınıb. Bu tədbirlər əməkhaqqı fondunun ölkə üzrə 3,2 dəfə artmasına səbəb olub.

Gülnar Nazimqızı