Nazir: Azərbaycan dili dərsliklərinin keyfiyyəti üçün 7–11 yaş uşaqların öyrənmə xüsusiyyətləri araşdırılmayıb

Azərbaycan dilinin tədrisi ilə bağlı, ayrı-ayrı yaş xüsusiyyətlərini və təhsil alanların öyrənmə xüsusiyyətlərini nəzərə almaqla onların öyrənmə keyfiyyətini tədqiq edən tədqiqatlar yoxdur. Bunu elm və təhsil naziri Emin Əmrullayev parlamentdə “Azərbaycan dilinin dövlət dili kimi inkişaf strategiyası: Mövcud vəziyyət və perspektivlər” mövzusuna həsr edilən konfransda çıxışı zamanı deyib.

"“Məzmun nə olursa olsun, dərslik nə qədər səmərəli yazılırsa yazılsın, sonda sinifdə vacib rol oynayan müəllimdir. Müəllimin özünün səriştəli olması minimal zəruri şərtdir. Bünövrə ibtidai təhsildə qoyulur, ona görə müəllimlərin burada üzərinə vacib vəzifə düşür", - nazir bildirib. 

Əmrullayev vurğulayıb ki, dilin tədrisi ilə bağlı, ayrı-ayrı yaş xüsusiyyətlərini və təhsil alanların öyrənmə xüsusiyyətlərini nəzərə almaqla onların öyrənmə keyfiyyətini tədqiq edən tədqiqatlar yoxdur.

"Dillə bağlı tədqiqatlar çoxdur, amma bu, bizə bir qədər fayda vermir. 7–11 yaş arası uşaqlara dili necə tədris etmək olar — dərsliklərin yazılmasında bizim üçün ən böyük problem budur. Çünki bizdə dərsliklər daha çox ayrı-ayrı müəlliflərin şəxsi mülahizələri əsasında yazılıb. Hesablanmış və daha yaxşı üsullardan istifadə edilməklə yazılan dərsliklərin olmamasının səbəbi məhz həmin tədqiqatların olmamasıdır", - o əlavə edib. 

Gülnar Nazimqızı