Bu ilin 10 ayında Azərbaycan–İran ticarət dövriyyəsi 520 milyon dollar olub

Azərbaycan və İran arasında ticarət dövriyyəsi 2025-ci ilin ilk 10 ayında 520 milyon dollar təşkil edib. Bu göstərici ötən ilin 650 milyon dollarlıq dövriyyəsindən aşağı olsa da, tərəflər iqtisadi potensialın daha yüksək olduğunu bildirib. Bunu Xarici işlər naziri Ceyhun Bayramov bildirib .

Bayramov Astaraçay üzərində yeni avtomobil körpüsü və gömrük-keçid məntəqəsinin istifadəyə verildiyini, Ağvənd–Kəlalə körpüsünün isə 2026-cı ilin əvvəlində tamamlanacağını deyib. 

Onun sözlərinə görə, Araz çayı üzərindəki bu körpü mövcud keçidlər arasında ən yüksək buraxılış qabiliyyətinə malik olacaq.

Nazir həmçinin Xudafərin və Qız Qalası hidroelektrik layihələrinin, eləcə də Bakı–Təbriz–Bakı aviareysinin açılmasının ikitərəfli əməkdaşlığı gücləndirdiyini qeyd edib.

Bayramov İran tərəfi ilə aparılan danışıqlarda regional təhlükəsizlik, enerji, nəqliyyat və humanitar əməkdaşlığın, həmçinin beynəlxalq təşkilatlar çərçivəsində koordinasiyanın müzakirə edildiyini deyib. 

O, eyni zamanda Ermənistan–Azərbaycan sülh prosesi və işğaldan azad olunan ərazilərdə aparılan bərpa işləri barədə Tehranı məlumatlandırıb.

Aytac Zeynalova