Şavkat Mirziyoyev İlham Əliyevi təbrik edib

Özbəkistan Respublikasının Prezidenti Şavkat Mirziyoyev Azərbaycan Prezidenti İlham Əliyevə doğum günü münasibətilə təbrik məktubu ünvanlayıb.

Məktubda Mirziyoyev Əliyevi “əzəli qardaşımızın vətənpərvər oğlu, müdrik rəhbər və beynəlxalq səviyyədə nüfuza malik dövlət xadimi” kimi qiymətləndirib və ən xoş arzularını çatdırıb. 

Mirziyoyev idarəçilik sahəsində Əliyevin zəngin təcrübəsinə və uzaqgörən siyasətinə diqqət çəkərək, Azərbaycan Respublikasının ərazi bütövlüyünün bərpası və beynəlxalq arenadakı mövqelərinin güclənməsinin bu siyasətin nəticəsi olduğunu vurğulayıb. Məktubda regional və qlobal təşəbbüslərin dünya ictimaiyyəti tərəfindən dəstəklənməsi xüsusi qeyd olunub.

Prezident Mirziyoyev dost və qardaş ölkələr arasında strateji tərəfdaşlıq və müttəfiqlik əlaqələrinin möhkəmləndirilməsi sahəsində birgə səylərin davam edəcəyinə inam ifadə edib və əməkdaşlığın gələcəkdə də inkişaf edəcəyini bildirib. 

Məktubda həmçinin Əliyevin ölkə və xalqların ümumi tərəqqisi üçün fəaliyyətində yeni nailiyyətlər qazanması üçün səmimi arzu və diləklər yer alıb.