XİN: TRIPP sənədi razılaşmaların icrasına keçid üçün əsas yaradır

Azərbaycan Xarici İşlər Nazirliyi “Beynəlxalq Sülh və Rifah naminə Tramp Marşrutu”nun (TRIPP) icrası üzrə çərçivə sənədinin qəbul edilməsini Vaşinqtonda əldə olunmuş razılaşmaların icrasına keçid baxımından mühüm addım kimi qiymətləndirib.

Nazirlikdən bildirilib ki, sənəd 8 avqustda Vaşinqtonda keçirilmiş sammit çərçivəsində əldə olunmuş razılaşmalara ABŞ tərəfinin sadiqliyini nümayiş etdirir və TRIPP təşəbbüsü üzrə praktiki mərhələnin başlanması üçün zəmin yaradır. Eyni zamanda, sənəd Ermənistanın üzərinə götürdüyü öhdəliklərin yerinə yetirilməsi baxımından əhəmiyyət daşıyır.

XİN-in vurğuladığına görə, Azərbaycanın əsas ərazisi ilə Naxçıvan Muxtar Respublikası arasında maneəsiz nəqliyyat bağlantısının təmin edilməsi ölkənin əsas prioritetlərindən biridir. TRIPP marşrutu isə daha geniş regionda ticarət və nəqliyyat-kommunikasiya əlaqələrinin şaxələndirilməsinə töhfə verə bilər.