Sahibə Qafarova Oman Şura Məclisinin sədri ilə görüşüb

Bu gün Milli Məclisin sədri Sahibə Qafarova Oman Sultanlığına rəsmi səfəri çərçivəsində bu ölkənin Şura Məclisinin sədri Şeyx Xalid bin Hilal Al Mavali ilə görüşüb.Bu barədə Milli Məclisin Mətbuat və ictimaiyyətlə əlaqələr şöbəsindən məlumat verilib.

Şura Məclisinin sədri Milli Məclisin sədrini salamlayaraq, dəvəti qəbul edib Oman Sultanlığına səfər etdiyinə görə spiker Sahibə Qafarovaya təşəkkürünü bildirib.

Oman və Azərbaycan arasında siyasi və digər əlaqələrin yaxşı səviyyədə olmasından məmnunluğunu ifadə edən Şura Məclisinin sədri qarşılıqlı münasibətlərin inkişafında parlamentlərin xüsusi rolunu,Milli Məclis sədrinin bu səfəri qarşılıqlı əlaqələrin daha da genişləndirilməsinə öz töhfəsini verəcəyini qeyd edib.

Görüşdə parlamentlərarası əlaqələrin iki ölkə arasında ikitərəfli və çoxtərəfli münasibətlərin inkişafına mühüm töhfə verdiyi diqqətə çatdırılıb. Parlament dostluq qruplarının fəaliyyəti, Asiya Parlament Assambleyası və Qoşulmama Hərəkatının Parlament Şəbəkəsi kimi platformaların bu sahədə əhəmiyyəti vurğulanıb.

Söhbət zamanı Oman Sultanlığı Şura Məclisinin sədri Şeyx Xalid bin Hilal Al Mavali Azərbaycanın müdrik rəhbərinin başçılığı ilə iqtisadi inkişafının şahidi olduqlarını diqqətə çatdırıb.