Azərbaycan İranla quru sərhədi aça bilərmi?

Azərbaycan və İran yüksək vəzifəli rəsmilər arasında aparılan danışıqlardan sonra quru sərhəd vasitəsilə sərnişin daşımalarının bərpası imkanını müzakirə edirlər. Bu barədə İranın mədəni irs, turizm və sənətkarlıq naziri Rza Salehi Amiri bildirib.

The Tehran Times qəzetinin yazdığına görə, nazir bu açıqlamanı Ərdəbil vilayətindən olan deputatlarla görüş zamanı səsləndirib.

Onun sözlərinə görə, İran prezidenti Məsud Pezeşkian ilə birlikdə Azərbaycana səfəri zamanı Prezident İlham Əliyev sərhədlə bağlı məsələyə “müsbət yanaşma” nümayiş etdirib.

Amiri qeyd edib ki, indiyədək Bakı təhlükəsizlik amillərini sərhədlərin açılmasına maneə kimi göstərirdi, lakin indi bu problemin aradan qaldırıldığını bildirib.

Onun sözlərinə görə, sərnişin keçidlərinin bərpası turizmin, sərhədyanı iqtisadiyyatın və ixracın inkişafına təkan verə bilər.

Nazir vurğulayıb ki, ötən İran təqvim ilində Ərdəbil vilayətini təxminən yeddi milyon nəfər ziyarət edib və bu rəqəmdə azərbaycanlı turistlərin payı artmaqdadır.

Ərdəbil vilayətinin general-qubernatoru Masud Emami Yeganə bildirib ki, Prezident Pezeşkian iki ölkənin sərhədyanı şəhərlərinin sakinləri üçün qısamüddətli vizaların verilməsinin vacibliyini də qeyd edib.

Bununla belə, Azərbaycan tərəfi İranla quru sərhədlərinin açılması məsələsi ilə bağlı hələlik rəsmi açıqlama verməyib. COVID-19 pandemiyasının başlanğıcından bəri ölkənin quru sərhədləri bağlı qalır və karantin rejimi Nazirlər Kabinetinin qərarı ilə mütəmadi olaraq uzadılır. Son qərara əsasən, sərhədlər 1 aprelədək bağlı qalacaq.

Müşahidəçilər hesab edirlər ki, sərhədlərin açılması ilə bağlı qərar yalnız İranla münasibətlər kontekstində qəbul edilməyəcək və belə bir addım atılarsa, bu, bütün qonşu ölkələrə şamil oluna bilər.

N.Təbrizli