Azərbaycanla bp arasında 30 ildən çoxdur heç bir hüquqi mübahisə olmayıb - Prezident

Azərbaycanla bp arasında 30 ildən artıq davam edən əməkdaşlıq dövründə heç bir narazılıq və ya hüquqi mübahisə yaranmayıb.

Dövlət başçısı İlham Əliyeb bu barədə ABŞ Ticarət Palatasının beynəlxalq üzvlərlə əlaqələr, Yaxın Şərq və Türkiyə üzrə baş vitse-prezidenti Kuş Çoksinin rəhbərlik etdiyi nümayəndə heyəti ilə görüşdə danışıb.

“Biz bp ilə 30 ildən artıq davam edən tərəfdaşlığı yüksək qiymətləndiririk. Bu əməkdaşlıq ölkənin transformasiyasında həlledici rol oynadı,” – Əliyev bildirib.

Prezident xatırladıb ki, Azərbaycan bp ilə birgə fəaliyyətə 1994-cü ildə, ölkənin ciddi sosial-iqtisadi çətinliklərlə üzləşdiyi dövrdə başlayıb. Onun sözlərinə görə, həmin vaxt büdcə imkanları məhdud idi, enerji çatışmazlığı mövcud idi və neft hasilatı kəskin azalırdı.
“Beynəlxalq enerji şirkətlərinin, xüsusilə bp-nin bizə etimadı ölkənin yaşaması və dövlət quruculuğu baxımından əsas rol oynadı. Biz bunu heç vaxt unutmayacağıq,” – deyə dövlət başçısı vurğulayıb.
Əliyev qeyd edib ki, hazırda bp ilə əməkdaşlıq bərpaolunan enerji sahəsinə doğru genişlənir. 

Onun sözlərinə görə, bp Cəbrayılda 240 meqavatlıq günəş elektrik stansiyası layihəsində iştirak edir, Səngəçal terminalının karbonsuzlaşdırılması isə şirkətin “yaşıl gündəlik” üzrə əsas töhfələrindən biridir.

Prezident əlavə edib ki, tərəflər qaz hasilatının artırılması və dərin sulu “Azəri–Çıraq–Günəşli” layihəsi daxil olmaqla yeni və mövcud enerji layihələri üzərində işi davam etdirir, eyni zamanda neft hasilatının sabitləşdirilməsi prioritet olaraq qalır.

Əliyev bildirib ki, neft hasilatının obyektiv səbəblərdən azalmasına baxmayaraq, Azərbaycana investisiya marağı yüksək olaraq qalır. O, həmçinin ExxonMobil şirkətinin yeni layihələr üzərində işlədiyini və ötən il Vaşinqtonda imzalanmış Anlaşma Memorandumunun perspektivli olduğunu qeyd edib.

Prezidentin sözlərinə görə, enerji satışından əldə olunan gəlirlər qeyri-neft sektoruna investisiyaların artırılması üçün əsas maliyyə mənbəyi olaraq qalacaq.

X.Əliyeva