ABŞ Ermənistana $11 milyardl dəyərində pilotsuz uçuş aparatları satacaq - Vens

 ABŞ və Ermənistan arasında texnologiya, mülki nüvə enerjisi, nəqliyyat və təhlükəsizlik sahələrində genişmiqyaslı əməkdaşlıq barədə razılaşmalar əldə olunub. Bunu ABŞ-ın vitse-prezidenti J.D. Vance İrəvanda Ermənistanın baş naziri Nikol Paşinyan ilə birgə bəyanatında bildirib.

Vens bildirib ki, əldə edilən razılaşmalar sülh prosesinin irəliləməsi fonunda ABŞ və Ermənistan arasında iqtisadi tərəfdaşlığı yeni mərhələyə çıxarır və Vaşinqton bu prosesi strateji prioritet hesab edir.

“Bu gün atılan addımlar təkcə sülhə deyil, həm də uzunmüddətli rifaha xidmət edir. Sülh keçmişə bağlılıqla deyil, gələcəyə fokuslanmaqla qurulur,” –  vitse-prezident qeyd edib.

NVIDIA çipləri və məlumat mərkəzləri

Vens ABŞ-ın Ermənistan üçün yüksək güclü NVIDIA çiplərinin ixracına lisenziyalar verdiyini açıqlayıb. Onun sözlərinə görə, bu çiplər əsasında Ermənistanda yeni məlumat mərkəzləri inşa olunacaq.

Bu addımın ABŞ-da yeni bazarlar və iş yerləri yaratmaqla yanaşı, Ermənistanda texnoloji inkişaf və iqtisadi artımı sürətləndirəcəyi bildirilib.

ABŞ və Ermənistan mülki nüvə enerjisi üzrə “1-2-3” formatında əməkdaşlıq sazişi üzrə danışıqları tamamlayıb. Razılaşma ABŞ şirkətlərinin Ermənistanda mülki nüvə layihələrində iştirakına yol açacaq.

Vens bildirib ki, ilkin mərhələdə bu əməkdaşlıq 5 milyard dollara qədər ABŞ ixracını, uzunmüddətli yanacaq və texniki xidmət müqavilələri isə əlavə 4 milyard dollar həcmində dövriyyəni nəzərdə tutur. Layihələr çərçivəsində ABŞ istehsalı olan kiçik modul reaktorların Ermənistanda tətbiqi planlaşdırılır.

TRIP fondu və regional inteqrasiya

Vitse-prezident, həmçinin TRIP Enterprise Fund çərçivəsində regionda dəmir yolları, boru kəmərləri və logistika infrastrukturuna özəl kapitalın cəlb ediləcəyini bildirib.

Onun sözlərinə görə, bu təşəbbüs ticarət, tranzit və enerji axınlarını genişləndirərək regional iqtisadi inteqrasiyanı gücləndirəcək və sülhün davamlılığını təmin edəcək.

Hərbi texnologiya satışı

Vens ABŞ-ın Ermənistana 11 milyard dollar dəyərində müşahidə və nəzarət məqsədli pilotsuz uçuş aparatları satacağını da açıqlayıb. O qeyd edib ki, bu texnologiyalar Ermənistanın təhlükəsizliyini gücləndirməklə yanaşı, ABŞ müdafiə sənayesi üçün də yeni sifarişlər və iş yerləri yaradacaq.

Vitse-prezident çıxışında ABŞ prezidenti Donald Trump-ın Ermənistan xalqına salamlarını çatdıraraq bildirib ki, bu səfər ABŞ-Ermənistan münasibətlərində “yeni başlanğıc”ı simvolizə edir.

Vens əlavə edib ki, ABŞ Ermənistanı regionda etibarlı tərəfdaş hesab edir və əməkdaşlığın genişləndirilməsində maraqlıdır.

N.Təbrizli