Serbiya prezidenti: Azərbaycanın zirə məhsulları çox dadlıdır

İki ölkə arasında əməkdaşlıq dinamik şəkildə inkişaf edir və indiyədək 57 sənəd imzalanıb. Bunu Serbiya Prezidenti Aleksandar Vuçiç Belqradda Azərbaycan Prezidenti İlham Əliyevlə mətbuata birgə bəyanatında bildirib.

Onun sözlərinə görə, xüsusilə turizm sahəsində əməkdaşlıq genişlənir və bu istiqamətdə müqavilələrin sayı artır.

Vuçiç qeyd edib ki, Serbiyadan Bakıya birbaşa uçuşların sayı artırılıb və bu addım iki ölkə arasında əlaqələrin daha da güclənməsinə xidmət edəcək.

“İstərdim ki, azərbaycanlılar Serbiyaya birbaşa səfər etsinlər və ölkəmizi yaxından tanısınlar”, –  Serbiya Prezidenti vurğulayıb.
O əlavə edib ki, Azərbaycan öz məhsullarını Serbiyaya güzəştli şərtlərlə ixrac edir. 

Vuçiç Azərbaycanın zirə məhsullarının keyfiyyətini də xüsusi qeyd edərək onların çox dadlı olduğunu bildirib.

Gülnar Nazimqızı