XİN regionda hərbi eskalasiya şəraitində vətəndaşların vəziyyəti ilə bağlı açıqlama yayıb

Azərbaycan Xarici İşlər Nazirliyi regional hərbi eskalasiya fonunda səfirlik və baş konsulluqların fəaliyyətini gücləndirdiyini,diplomatik missiyaların vətəndaşlardan daxil olan müraciətlərə uyğun dəstək göstərdiyini bildirib.Bu barədə Xarici İşlər Nazirliyinin Mətbuat xidməti idarəsinin rəisi Ayxan Hacızadə regionda hərbi eskalasiya şəraitində vətəndaşlarımızın vəziyyəti ilə bağlı yerli mətbuatın sualına cavabında deyib.

Nazirlik bildirib ki, indiyə qədər yalnız bir nəfər Azərbaycan vətəndaşı xəsarət alıb və ona müvafiq dəstək göstərilir.

Hacızadə əlavə edib ki, İran ərazisində olan vətəndaşların çıxışı üçün quru sərhədlərdən istifadə edilir və indiyə qədər 30 nəfər Azərbaycan sərhədindən keçib.

Açıqlamada hava məkanının bağlılığı səbəbindən hazırda təşkil olunmuş genişmiqyaslı təxliyə planlarının olmadığı vurğulanıb.

XİN həmçinin bölgədə olan vətəndaşlardan təhlükəsizlik vəziyyətini izləmələrini, yerli hakimiyyət orqanlarının tövsiyələrinə riayət etmələrini və kütləvi toplaşmalardan çəkinmələrini xahiş edib.