Əraqçi Ceyhun Bayramova zəng edib

İranın xarici işlər naziri Seyid Abbas Əraqçi azərbaycanlı həmkarı Ceyhun Bayramova zəng vurub.Bu barədə Xarici İşlər Nazirliyi məlumat yayıb.

Məlumata görə, telefon danışığı zamanı Bayramov İran tərəfindən Azərbaycanın Naxçıvan Muxtar Respublikası ərazisinə edilən dron hücumlarını qətiyyətlə pisləyib və buna etirazını bildirib. Nazir hücumların beynəlxalq hüququn norma və prinsiplərinə zidd olduğunu və regionda gərginliyin artmasına xidmət etdiyini vurğulayıb.

Əraqçi isə Naxçıvana dron hücumları ilə bağlı narahatlığını ifadə edib və hadisə ilə bağlı araşdırma aparıldığını bildirib. O, hücum nəticəsində yaralanan mülki şəxslərə şəfa diləyib.

Azərbaycan tərəfi İranın hücumla bağlı üzr istəməsini, araşdırmanın nəticələri barədə qısa müddətdə izahat verməsini və bu kimi halların gələcəkdə təkrarlanmaması üçün zəruri tədbirlər görülməsini gözlədiyini qarşı tərəfin diqqətinə çatdırıb.