Məsud Pezeşkian İlham Əliyevə zəng edib

Martın 8-də İran İslam Respublikasının Prezidenti Məsud Pezeşkian Azərbaycan Respublikasının Prezidenti İlham Əliyevə zəng edib.Bu barədə Azərbaycan Prezidentinin Mətbuat xidməti məlumat yayıb.

Pezeşkian dövlət başçısının İran İslam Respublikasının Ali Rəhbəri Əli Xamenei və bir sıra mülki şəxslərin həlak olması ilə əlaqədar Tehranın Bakıdakı səfirliyinə gələrək başsağlığı verməsinə, həmçinin İrana humanitar yardım göstərmək niyyətinə görə təşəkkürünü bildirib.

Telefon danışığı zamanı Pezeşkian Naxçıvanın havadan atəşə tutulması ilə bağlı insidentin İranla əlaqəsi olmadığını deyib və hadisənin araşdırılacağını qeyd edib.

Əliyev isə İranda baş vermiş son hadisələr nəticəsində çoxsaylı mülki şəxslərin həlak olması ilə bağlı başsağlığını bir daha çatdırıb və Naxçıvanda baş vermiş insidentin araşdırılmasının vacibliyini vurğulayıb.

Söhbət zamanı dövlət başçıları iki ölkə arasında müştərək iqtisadi layihələrin inkişaf perspektivləri ilə bağlı müzakirə aparıblar.