BMT rəsmisi: Hazırda dünyada 100-ə yaxın silahlı münaqişə var

Hazırda dünyada təxminən 100-ə yaxın aktiv silahlı münaqişə mövcuddur və beynəlxalq vəziyyət son dərəcə gərgin olaraq qalır. Bu sözləri BMT Baş Assambleyasının 73-cü sessiyasının Prezidenti Maria Fernanda Espinosa  Bakı Qlobal Forumunun XIII toplantısına həsr olunmuş mətbuat konfransında səsləndirib.

Espinosanın sözlərinə görə, qlobal təhlükəsizlik mühiti getdikcə daha mürəkkəb xarakter alır.

“Hazırda dünyada təxminən 100-ə yaxın aktiv silahlı münaqişə mövcuddur. Dünya müharibə vəziyyətindədir və Bakı Forumu artıq təkcə qlobal geosiyasətin məlumatlı təhlili üçün deyil, həm də yeni ideyalar, alternativlər və həll yolları üçün mühüm platformaya çevrilib”, –  o bildirib.

Onun sözlərinə görə, regionda vəziyyətin gərgin olmasına baxmayaraq, forum geniş beynəlxalq iştirakla seçilir.
Espinosa qeyd edib ki, tədbirdə dünyanın müxtəlif bölgələrindən 350-dən çox mütəfəkkir, siyasətçi, parlament üzvü, dövlət və hökumət başçısı iştirak edəcək.

“Bu, həm forumun əhəmiyyətini, həm də Azərbaycanın dialoq və səmərəli diplomatiya üçün mühüm məkan kimi rolunu göstərir”, –  o vurğulayıb.

O əlavə edib ki, forum çərçivəsində gənc nəslin fikirlərinə də xüsusi yer ayrılır və tədbir qlobal dialoq üçün geniş platforma yaradır.

Sabiq BMT Baş Assambleyası prezidenti bildirib ki, forumun əsas məqsədi qlobal problemlərin həlli üçün yeni ideyalar və alternativ yanaşmalar irəli sürməkdir.

Gülnar Nazimqızı