Jean Baderschneider: Azərbaycan təhlükəsiz tranzit məkanı və qlobal dialoq üçün vacib platformadır

 Azərbaycan həm təhlükəsiz tranzit məkanı, həm də qlobal dialoq üçün mühüm platformaya çevrilir. Bunu “Fortescue Ltd.” şirkətinin İdarə Heyətinin üzvü, “The Global Fund to End Modern Slavery” təşkilatının təsisçisi və sədri, həmçinin “ExxonMobil” şirkətinin sabiq vitse-prezidenti (2000–2013) Jean Baderschneider  Bakı Qlobal Forumunun XIII toplantısına həsr olunmuş mətbuat konfransında səsləndirib.

Baderschneider qeyd edib ki, qlobal hava nəqliyyatının xəritəsinə baxdıqda Azərbaycanın strateji mövqeyi aydın görünür.
“Əgər internetdə hava hərəkətini göstərən saytlara baxsanız, görərsiniz ki, şərqdən qərbə uçan çoxlu sayda təyyarə Azərbaycan üzərindən keçir. Azərbaycan hava məkanı təhlükəsiz tranzit məkanı kimi istifadə olunur,” –  o bildirib.

O əlavə edib ki, ABŞ-dan Bakıya səfər etməzdən əvvəl bəzi insanlar ona regionda təhlükəsizlik vəziyyəti ilə bağlı ehtiyatlı olmağı tövsiyə ediblər.

“Mən ABŞ-dan gəlmişəm və bir çox insan mənə dedi ki, guya ‘müharibə zonasına getməməlisən. Amma hesab edirəm ki, bu forum çox vacibdir və Bakı sağlam məntiqə əsaslanan həll yolları üçün mühüm məkandır. Buna görə də burada olmaq vacibdir,” –  o vurğulayıb.

Onun sözlərinə görə, hazırda beynəlxalq təşkilatların fəaliyyətində müəyyən durğunluq müşahidə olunur, Birləşmiş Millətlər Təşkilatı də daxil olmaqla qlobal institutlara tənqidlər artır, eyni zamanda orta güclərin rolu yüksəlir.

Baderschneider hesab edir ki, belə bir şəraitdə Azərbaycan çoxtərəfli əməkdaşlıq və müxtəlif tərəfdaşlıqlar üzərində qurulan modeldə mühüm rol oynaya bilər.

Gülnar Nazimqızı