Bayramov UNESCAP sessiyası üçün Banqkokdadır

Azərbaycanın xarici işlər naziri Ceyhun Bayramov BMT-nin UNESCAP-ın 82-ci sessiyasında iştirak etmək üçün Tailandın paytaxtı Bangkok şəhərinə səfər edib.

Bu barədə Azərbaycan Xarici İşlər Nazirliyi sosial media platforması “X”də məlumat yayıb.

“Heç kimi geridə qoymamaq: Asiya və Sakit Okean regionunda inklüziv cəmiyyətlərin qurulması” mövzusu ilə keçiriləcək sessiyada layiqli iş, bütün yaş qrupları üçün tam və məhsuldar məşğulluq, qadınların iqtisadi imkanlarının genişləndirilməsi və sosial inteqrasiya kimi məsələlərin müzakirəsi planlaşdırılır.

Nazirin səfəri çərçivəsində 20 aprel tarixində Azərbaycanın sədrliyi ilə keçiriləcək sessiyada çıxışı, həmçinin yüksək səviyyəli rəsmilərlə görüşləri nəzərdə tutulur.