Deputatlar Belçika və Niderland qətnamələrini rədd edir

Milli Məclisin deputatları Belçika və Niderland parlamentlərinin qəbul etdiyi qətnamələri qərəzli adlandıraraq kəskin şəkildə rədd ediblər.

Milli Məclisin deputatı Tural Gəncəliyev bildirib ki, sənədlərdə Azərbaycan-Ermənistan münasibətlərində müsbət dinamika nəzərə alınmayıb və bu, “açıq qərəzin göstəricisidir”.

Digər deputat Zaur Şükürov qətnamələri “qəbuledilməz” adlandıraraq parlament səviyyəsində etiraz edildiyini qeyd edib.

Elçin Mirzəbəyli Niderlandla parlamentlərarası işçi qrupunun fəaliyyətinin dayandırılmasını təklif edib.

Elman Nəsirov isə bu addımları Azərbaycan-Ermənistan sülh prosesinə zərbə kimi qiymətləndirib.

Parlament üzvü Erkin Qədirli bildirib ki, sənədlərdə saxlanılan erməni əsilli şəxslərlə bağlı yanaşmalar ziddiyyətlidir və onları “müharibə törətmiş şəxslər” kimi xarakterizə edib.

Daha əvvəl Azərbaycan Xarici İşlər Nazirliyi Belçika və Niderlandın Azərbaycandakı səfirlərini -Julyen de Frepon və Marian de Jonq -nazirliyə çağıraraq sənədlərə qarşı rəsmi etirazını çatdırıb. XİN bu qətnamələri Azərbaycanın suverenliyi və ərazi bütövlüyünə zidd, həmçinin sülh prosesinə maneə kimi qiymətləndirib.

Belçika və Niderland parlamentlərinin 16 aprel tarixli sənədlərində Azərbaycana qarşı bir sıra tələblər və ittihamlar yer alıb. Belçika parlamentinin qəbul etdiyi qətnamədə Azərbaycan Ermənistanla paraflanmış sülh sazişini imzalamağa çağırılır, Bakıda saxlanılan erməni məhbusların “ədalətli və şəffaf məhkəmə” hüququnun təmin olunması istənilir və Azərbaycanın Ermənistanın suveren ərazilərindən hərbi qüvvələrini çıxarması tələb olunur.

Sənəddə, həmçinin, Belçika hökumətinə Ermənistanla münasibətləri dərinləşdirmək, Aİ-nin Ermənistandakı missiyasını gücləndirmək və Yerevanda keçiriləcək beynəlxalq platformalardan istifadə edərək Ermənistan-Azərbaycan sülh prosesinə təsir göstərmək tövsiyə olunur.

Niderland parlamentinin qəbul etdiyi 3384 saylı motionda isə Azərbaycanda saxlanılan erməni hərbi əsirləri və qondarma rejimin rəhbərlərinin azad olunması üçün hökumətin Aİ çərçivəsində addımlar atması tələb edilir. Digər, 3385 saylı motionda isə Ermənistan-Azərbaycan sülh danışıqları ilə Niderlandın “erməni soyqırımı” və Sayfo məsələsində mövqeyi arasında əlaqə olmamalı olduğu vurğulanır.

Gülnar Nazimqızı