XİN fransalı nazirin Azərbaycan əleyhinə səsləndirdiyi iddiaları rədd edib

Azərbaycan Xarici İşlər Nazirliyi Fransanın Avropa və xarici işlər naziri Jan-Noel Baronun Senatda səsləndirdiyi Azərbaycan əleyhinə iddiaları rədd edib.Bu barədə XİN-in mətbuat katibi Ayxan Hacızadə bildirib.

Hacızadə Fransanın xarici işlər nazirinin Azərbaycanın Qarabağ bölgəsi ilə bağlı “Dağlıq Qarabağ” ifadəsini işlətməsini qəbuledilməz adlandırıb.

Onun sözlərinə görə, Fransanın Azərbaycanın suverenliyi və mədəni irsin qorunması ilə bağlı açıqlamaları “təhrikçi xarakter daşıyır” və regionda davamlı sülh səylərinə xidmət etmir.

XİN bildirib ki, Ermənistanın işğalı dövründə Azərbaycan ərazilərində məscidlərin və digər mədəni irs nümunələrinin dağıdılması fonunda Fransanın bəzi tikililərin sökülməsi ilə bağlı iradları ikili standartın göstəricisidir.

Ayxan Hacızadə qeyd edib ki, Azərbaycanın nəzarətində olan ərazilərdəki tarixi və dini abidələr mənşəyindən və dini mənsubiyyətindən asılı olmayaraq qorunur.

XİN həmçinin Fransanın UNESCO missiyası ilə bağlı çağırışlarını “reallıqların təhrif olunması” kimi qiymətləndirib və bildirib ki, Azərbaycan belə missiyaların həyata keçirilməsini dəfələrlə dəstəkləsə də, buna Ermənistan və bəzi ölkələrin mane olduğu UNESCO-nun 2005-ci il hesabatında da əksini tapıb.