Deputat Azərbaycana qarşı olan siyasi kampaniyaları tənqid edib

Milli Məclisin deputatı Bəhruz Məhərrəmov Azərbaycanın beynəlxalq tədbirlər ərəfəsində yenidən “anti-Azərbaycan kampaniyası” ilə üzləşdiyini açıqlayıb. 

Deputat XIII Ümumdünya Şəhərsalma Forumu ərəfəsində, həmçinin COP29 və Qoşulmama Hərəkatına sədrlik dövrü fonunda ölkəyə qarşı oxşar siyasi kampaniyaların müşahidə olunduğunu deyib.

Onun sözlərinə görə, bu cür fəaliyyətlər xüsusilə Avropa Parlamenti və AŞPA kimi qurumlar, eləcə də Fransa ilə əlaqələndirilən siyasi dairələr tərəfindən həyata keçirilir.

Məhərrəmov bildirib ki, bəzi beynəlxalq platformalarda “siyasi məhbus” və “hərbi əsir” mövzularının yenidən gündəmə gətirilməsi cəhdləri Azərbaycanın suverenliyinə qarşı yönəlmiş siyasi təzyiq kimi qiymətləndirilməlidir.

Deputat qeyd edib ki, Azərbaycan hüquqi dövlətdir və cinayət törətməkdə ittiham olunan şəxslərin məsuliyyətdən yayınmasına imkan verilməyəcək.

O əlavə edib ki, “qondarma siyahılar” və beynəlxalq kampaniyalar ölkənin daxili hüquqi proseslərinə təsir göstərə bilməz.

Gülnar Nazimqızı