Nidal Salim: Qlobal Cənub ölkələri su və ətraf mühit sahəsində əməkdaşlığı gücləndirməlidir

Qlobal Cənub ölkələri su, ətraf mühit və sağlamlıq sahəsində bilik mübadiləsi, texnologiya transferi və potensialın artırılması üzrə əməkdaşlığı genişləndirməlidir.

Bunu Qlobal Su, Ətraf Mühit və Sağlamlıq İnstitutunun təsisçisi, Asiya Su Şurasının İdarə Heyətinin üzvü Nidal Salim Qlobal Cənub QHT Platformasının Baş Assambleyasında çıxışı zamanı bildirib.

Onun sözlərinə görə, Cenevrədə yerləşən institut 2008-ci ildən regionda Cənub-Cənub əməkdaşlığı, qadınların və gənclərin dəstəklənməsi, eləcə də su və ətraf mühit sahəsində potensialın artırılması istiqamətində fəaliyyət göstərir.

Salim bildirib ki, yaxın aylarda institut Cənub-Cənub əməkdaşlığı çərçivəsində üç əsas təşəbbüs elan edəcək.

Bunlardan birincisi 24-26 noyabrda Nayrobidə keçiriləcək Afrika Su Operatorları Tərəfdaşlığı konfransı və sərgisidir.

İkinci təşəbbüs COP31 çərçivəsində Türkiyənin Antalya şəhərində su və ətraf mühit texnologiyaları mərkəzinin yaradılmasıdır.

Üçüncü təşəbbüs isə 2027-ci ilin sentyabrında Filippinin Manila şəhərində keçiriləcək IV Asiya Su Forumudur.

“Bu Assambleya Afrika, Asiya, Latın Amerikası və Cənubi Qafqaz arasında inklüziv və davamlı inkişaf naminə tərəfdaşlığı daha da gücləndirir”, - Salim bildirib.

Gülnar Nazimqızı