İlham Əliyev Kasım-Jomart Tokayevə zəng edib

Mayın 17-də Azərbaycan Prezidenti İlham Əliyev Qazaxıstan Prezidenti Kasım-Jomart Tokayevə zəng edib.Bu barədə Prezidentin Mətbuat Xidməti məlumat yayıb.

İlham Əliyev qazaxıstanlı həmkarını ad günü münasibətilə təbrik edib, ona möhkəm cansağlığı, dövlət fəaliyyətində uğurlar, Qazaxıstan xalqına isə rifah və tərəqqi arzulayıb.

Kasım-Jomart Tokayev göstərilən diqqətə və səmimi təbriklərə görə təşəkkürünü bildirib.

Telefon danışığı zamanı Azərbaycan və Qazaxıstan arasında dostluq və strateji tərəfdaşlıq münasibətlərinin inkişafından məmnunluq ifadə olunub, əməkdaşlığın müxtəlif sahələrdə genişləndirilməsi perspektivləri müzakirə edilib.

Tərəflər həmçinin mayın 15-də Türküstan şəhərində keçirilən Türk Dövlətləri Təşkilatının qeyri-rəsmi Zirvə görüşünü xatırlayıb, tədbirin Türk dünyasında həmrəyliyin və çoxtərəfli əməkdaşlığın gücləndirilməsi baxımından əhəmiyyətini vurğulayıblar.