Əlimizdə konkret məlumatlar yoxdur - Rossbax

Qlobal mənzil və şəhər böhranı bütün regionlarda eyni səviyyədə hiss olunmur və bir çox yerlərdə problemlər görünməz qalır. Bunu UN-Habitat-ın icraçı direktoru Anaklaudia Rossbax WUF13 çərçivəsində keçirilən dəyirmi masada bildirib.


“Əlimizdə konkret məlumat yoxdur, amma mən deyərdim ki, yox. Çünki mən ölkələrə səfər etdikdə yerində çox şey görürəm, lakin sonra onlar barədə heç nə oxuya bilmirəm. Çünki həmin problemlər məlumat bazalarında və tədqiqatlarda görünmür,”- Rossbach WUF13 çərçivəsində keçirilən müzakirədə bildirib.

Onun sözlərinə görə, dünyada tədqiqat imkanları ilə praktik problemlərin yaşandığı regionlar arasında ciddi uyğunsuzluq mövcuddur.

“Bəzi coğrafiyalarda resurslar, universitetlər və araşdırma institutları var, digər regionlarda isə praktikaya daha yaxın olan qurumlar mövcuddur, lakin onların araşdırma aparmaq üçün nə maliyyəsi, nə də institusional imkanları kifayət edir. Bu struktur xarakterli problemdir və biz bunu unutmamalıyıq,” – o qeyd edib.

Rossbax bildirib ki, əsas məqsəd yalnız forum çərçivəsində müzakirə aparmaq deyil, davamlı əməkdaşlıq şəbəkəsi yaratmaqdır.

“Mən ümid edirəm ki, bu icma burada bitməyəcək. İki il əvvəl Qahirədə başladığımız söhbətin davam etməsini istəyirəm,” –o əlavə edib.

Gülnar Nazimqızı