Nigar Arpadarai: Mənzil böhranı artıq qlobal problemə çevrilib

Mənzil böhranı həm inkişaf etməkdə olan, həm də inkişaf etmiş ölkələr üçün reallığa çevrilib, bunu BMT-nin COP29 üzrə iqlim lideri, Milli Məclisin deputatı Nigar Arpadarai WUF13 çərçivəsində keçirilən tədbirdə bildirib.

Onun sözlərinə görə, hazırda dünyada təxminən 3 milyard insan qeyri-adekvat mənzil şəraitində yaşayır və bu problem sürətli urbanizasiya, münaqişələr və iqlim dəyişikliyi fonunda daha da dərinləşir.

Arpadarai qeyd edib ki, iri banklar və investorların meqapolislərdə daşınmaz əmlakı alması, qiymətlərin isə süni şəkildə artırılması orta təbəqənin mənzil əldə etmək imkanlarını məhdudlaşdırır.

“Orta təbəqə dünyanın ən böyük paytaxtlarında belə öz maaşı ilə mənzil sahibi ola bilmir. Biz bu faktı etiraf etməliyik”, - deputat bildirib.

Onun sözlərinə görə, milyonlarla ailənin mənzil probleminin həlli üçün ucuz və uzunmüddətli maliyyələşmə alətlərinə ehtiyac var.

Arpadarai bildirib ki, COP29 çərçivəsində tərəflərin müəyyən öhdəliklər götürməsinə nail olunub, lakin sistemli dəyişikliklər üçün maliyyələşmə həcmləri trilyonlarla dollara çatdırılmalıdır.

Deputat vurğulayıb ki, beynəlxalq ictimaiyyət bu investisiyaların Qlobal Cənubun ən həssas icmalarına çatmasını təmin etməlidir.

Gülnar