Donald Tramp İlham Əliyevə təbrik göndərib

ABŞ Prezidenti Donald Tramp Azərbaycan Prezidenti İlham Əliyevə Müstəqillik Günü münasibətilə təbrik məktubu göndərib.

Məktubda Vaşinqton və Bakı arasında strateji tərəfdaşlığın inkişafından, həmçinin Azərbaycan-Ermənistan sülh prosesindən bəhs olunub.

Tramp bildirib ki, 2025-ci ilin avqustunda Vaşinqtonda keçirilən sülh sammitindən sonra tərəflər münasibətlərin canlandırılması istiqamətində birgə fəaliyyət göstərib. O qeyd edib ki, ABŞ-nin vitse-prezidenti Cey Di Vens 2026-cı il fevralın 10-da Bakıda Strateji Tərəfdaşlıq Xartiyasını imzalayıb.

ABŞ Prezidenti regional bağlantılar, iqtisadi münasibətlər və təhlükəsizlik sahəsində əməkdaşlığın dərinləşdirildiyini vurğulayıb.

Məktubda ABŞ-nin Azərbaycan və Ermənistan arasında dayanıqlı sülhü dəstəkləməyə davam etdiyi qeyd olunub. Tramp Azərbaycanın ötən ilin avqustunda paraflanmış sülh sazişinin irəlilədilməsi, sərhədlərin delimitasiyası, 2026-cı ilin yanvarında dörd erməni məhbusun azad edilməsi, Ermənistana yanacaq tədarükü və “Sülh Körpüsü” təşəbbüsü ilə bağlı addımlarını müsbət qiymətləndirib.

ABŞ Prezidenti tərəflər arasında strateji tərəfdaşlığın gələcək illərdə daha da möhkəmlənəcəyinə ümid etdiyini bildirib və Azərbaycan xalqına xoş arzularını çatdırıb.