Aİ 2050-ci ilə qədər enerji keçidində Azərbaycanla əməkdaşlığı genişləndirəcək - Kristina Lobillo

Avropa İttifaqı 2050-ci ilədək karbon neytrallığı hədəfinə doğru irəliləsə də, keçid dövründə təbii qaz və neft idxalını davam etdirəcək və enerji mənbələrinin şaxələndirilməsinə xüsusi diqqət yetirəcək.

Bunu Avropa Komissiyasının Enerji Baş Direktorluğunun Enerji Təhlükəsizliyi və Beynəlxalq Əlaqələr üzrə direktoru Kristina Lobillo Borrero Bakı Enerji Həftəsində çıxışı zamanı deyib.

Onun sözlərinə görə, Avropa Rusiyadan enerji asılılığının yaratdığı riskləri nəzərə alaraq enerji təchizatının diversifikasiyasını sürətləndirir və bu prosesdə Azərbaycan mühüm tərəfdaşdır.

“Avropa iqtisadiyyatının tam transformasiyası zaman tələb edir və bizim hədəfimiz 2050-ci ildir. Bu müddətdə Avropa İttifaqı qaz və neft idxalını davam etdirəcək. Biz enerji təchizatını şaxələndirmək üçün çalışırıq, çünki Rusiyadan asılılıq bir çox üzv dövlətlər üçün çox ağır təcrübə oldu”, – Lobillo Borrero bildirib.

Onun sözlərinə görə, Azərbaycan Avropanın enerji təhlükəsizliyində strateji rol oynayır.

“Azərbaycan Cənub Qaz Dəhlizi vasitəsilə qaz təchizatında bizim strateji tərəfdaşımızdır. Son dörd ildə bu marşrutla Avropa İttifaqına qaz nəqli 40% artıb. Bu, Rusiyadan qaz asılılığının azaldılması siyasətimizdə mühüm rol oynayıb”, – o deyib.

Lobillo Borrero əlavə edib ki, tərəflər arasında əməkdaşlığın ikinci əsas istiqaməti bərpa olunan enerji və Yaşıl Enerji Dəhlizidir.

“Azərbaycanın xüsusilə dənizdə külək enerjisinin inkişafı üzrə çox iddialı planları var. Biz bu sahədə əməkdaşlığı genişləndirmək niyyətindəyik. Həmçinin Yaşıl Enerji Dəhlizi vasitəsilə təmiz elektrik enerjisinin ötürülməsi və ticarəti üzrə birgə işləməyi planlaşdırırıq”, – Avropa Komissiyasının rəsmisi bildirib.

Onun sözlərinə görə, enerji təhlükəsizliyi yalnız mövcud təchizatın təmin olunması deyil, həm də gələcək üçün çevik, balanslaşdırılmış və dayanıqlı enerji siyasətinin formalaşdırılması deməkdir.

Azərbaycandan qaz tədarükü ilə yanaşı, yaşıl enerji layihələri də Aİ-Azərbaycan enerji tərəfdaşlığının əsas sütunlarından birinə çevrilir.

Gülnar Nazimqızı