Ceyhun Bayramov kanadalı həmkarı ilə telefon danışığı aparıb

Azərbaycanın xarici işlər naziri Ceyhun Bayramov ilə Kanadanın xarici işlər naziri Anita Anand arasında telefon danışığı aparılıb.

Azərbaycan Xarici İşlər Nazirliyinin məlumatına görə, nazirlər Azərbaycan-Kanada münasibətlərinin mövcud vəziyyəti və inkişaf perspektivlərini, eləcə də qarşılıqlı maraq doğuran regional məsələləri müzakirə ediblər. 

Anita Anand Azərbaycanın Müstəqillik Günü münasibətilə təbriklərini çatdırıb və Ottavanın Bakı ilə əlaqələrin inkişafında maraqlı olduğunu bildirib. 

Ceyhun Bayramov təbrikə görə təşəkkür edərək, iki ölkə arasında siyasi dialoqun və müxtəlif sahələr üzrə əməkdaşlığın genişləndirilməsi üçün potensialın mövcud olduğunu vurğulayıb.

Tərəflər yaşıl keçid, bərpa olunan enerji, informasiya-kommunikasiya texnologiyaları, enerji təhlükəsizliyi və digər istiqamətlərdə əməkdaşlıq imkanlarını nəzərdən keçiriblər.

Telefon danışığında regiondakı vəziyyət, postmünaqişə dövrünün reallıqları, həmçinin Azərbaycan-Ermənistan normallaşma və sülh prosesi ətrafında fikir mübadiləsi aparılıb. Bayramov keçmiş münaqişənin tarixi və Azərbaycanın sülh və sabitliyin təmin olunmasına yönəlmiş səyləri barədə məlumat verib.