“Azərbaycan və Aİ arasında yeni tərəfdaşlıq sazişi üzrə danışıqlar davam edir-Viktor Bojkov

Azərbaycan və Avropa İttifaqı (Aİ) arasında münasibətlərin yeni səviyyəyə yüksəldilməsi istiqamətində danışıqlar davam edir. Bu barədə Avropa İttifaqı (Aİ) Nümayəndəliyində Əməkdaşlıq Bölməsinin rəhbəri Viktor Bojkov Aİ–Azərbaycan tərəfdaşlığının 30 illiyi və Gəncədə həyata keçirilən layihələrə dair keçirilən media brifinqində deyib.

Onun sözlərinə görə, Azərbaycanla Aİ arasında 30 il əvvəl imzalanmış tərəfdaşlıq sazişi hələ də qüvvədədir. Lakin dünyada baş verən siyasi, iqtisadi və geosiyasi dəyişikliklər fonunda tərəflər münasibətləri qarşılıqlı maraqlara uyğun şəkildə yeniləməyə çalışırlar.

Bojkov qeyd edib ki, iyunun 2-3-də Bakıda Aİ-nin Xarici Fəaliyyət Xidmətinin baş direktor müavini və Azərbaycanın xarici işlər nazirinin müavininin iştirakı ilə ikitərəfli münasibətlərin yeni mərhələyə keçirilməsi məqsədilə intensiv danışıqlar aparılıb.

“Yeni ikitərəfli saziş üzrə danışıqlar davam edir. Sənədin imzalanması üçün hələ vaxt tələb olunur, lakin hər iki tərəf əməkdaşlığın genişləndirilməsində maraqlıdır”, – o bildirib.

Bölmə rəhbərinin sözlərinə görə, Aİ ilə Azərbaycanın əməkdaşlığı ətraf mühit, əlaqələndirmə və nəqliyyat, səhiyyə, akademik tədqiqatlar, insanlararası əlaqələr və yaşıl şəhərlər kimi müxtəlif sahələri əhatə edir.

Aytac Zeynalova