Azərbaycan və Slovakiya XİN-ləri arasında siyasi məsləhətləşmələrin növbəti iclası keçirilib

Azərbaycanın xarici işlər naziri Ceyhun Bayramov iyunun 12-də Slovakiyanın Xarici və Avropa İşləri Nazirliyinin dövlət katibi Marek Eştoku qəbul edib.Bu barədə Xarici İşlər Nazirliyi məlumat yayıb.

Görüşdə Azərbaycan-Slovakiya ikitərəfli və çoxtərəfli münasibətlərinin mövcud vəziyyəti və inkişaf perspektivləri, həmçinin regional təhlükəsizlik məsələləri müzakirə olunub.

Tərəflər siyasi dialoqun, qarşılıqlı səfərlərin və institusional əməkdaşlığın ikitərəfli əlaqələrin inkişafına mühüm töhfə verdiyini vurğulayıblar.

Həmin gün Azərbaycan və Slovakiya xarici işlər nazirlikləri arasında siyasi məsləhətləşmələrin növbəti iclası da keçirilib. Azərbaycan nümayəndə heyətinə xarici işlər nazirinin müavini Fariz Rzayev, Slovakiya nümayəndə heyətinə isə dövlət katibi Marek Eştok rəhbərlik edib.

Məsləhətləşmələr zamanı tərəflər Azərbaycan və Slovakiya arasında strateji tərəfdaşlıq əlaqələrinin inkişafını müsbət qiymətləndirib, nəqliyyat, təhsil, mədəniyyət və turizm sahələrində əməkdaşlığın genişləndirilməsi, eləcə də müqavilə-hüquq bazasının möhkəmləndirilməsi məsələlərini nəzərdən keçiriblər.

Görüşdə Azərbaycanın iştirak etdiyi regional və beynəlxalq nəqliyyat layihələri, o cümlədən Orta Dəhlizin əhəmiyyəti müzakirə olunub. Tərəflər beynəlxalq təşkilatlar çərçivəsində əməkdaşlıq və qarşılıqlı dəstək məsələləri ətrafında da fikir mübadiləsi aparıblar.

Məsləhətləşmələrdə regiondakı vəziyyət, Azərbaycan-Ermənistan normallaşma prosesi, işğaldan azad edilmiş ərazilərdə aparılan bərpa və yenidənqurma işləri, eləcə də minatəmizləmə fəaliyyəti müzakirə olunan mövzular sırasında olub.