Spiker tələbələri parlament jurnalistikasına cəlb etməyi təklif edir

Müasir dövrün çağırışları yeni yanaşmaların formalaşdırılmasını zəruri edir. Bunu Milli Məclisin spikeri Sahibə Qafarova deyib. 

Spiker qeyd edib ki, bu istiqamətdə Milli Məclisin aidiyyəti komitələri tərəfindən dinləmələrin təşkili də nəzərdən keçirilə bilər.

“Çağırışlar qarşısında yeni yanaşmalar ortaya qoymalıyıq. Zərurət yaranarsa, bununla bağlı komitə səviyyəsində dinləmələr də keçirilə bilər”, - o bildirib.

Sahibə Qafarova vurğulayıb ki, hər il müxtəlif ali təhsil müəssisələrinin tələbələri Milli Məclisə təcrübə keçmək üçün müraciət edirlər və bu təcrübə gənclərin peşəkar hazırlığı baxımından əhəmiyyətlidir.

“Bakı Dövlət Universiteti də daxil olmaqla müxtəlif universitetlərdən tələbələr staj keçmək üçün bizə müraciət edirlər. Hesab edirəm ki, jurnalistika fakültələrinin tələbələrinin də bu prosesdə daha fəal iştirakı faydalı olar”, – spiker qeyd edib.

Onun sözlərinə görə, parlamentdə fəaliyyət göstərən peşəkar jurnalistlər və media nümayəndələri tələbələrin praktiki biliklərinin artırılmasına töhfə verə bilər.

“Jurnalistika tələbələri parlament fəaliyyətini yaxından izləyə, burada çalışan peşəkar jurnalistlərlə əməkdaşlıq edə və ictimai-siyasi proseslərin işıqlandırılması sahəsində təcrübə qazana bilərlər”, –  Sahibə Qafarova əlavə edib.

Gülnar Nazimqızı