İlham Əliyev Şavkat Mirziyoyevi doğum günü münasibətilə təbrik edib

Azərbaycan Prezidenti İlham Əliyev Özbəkistan Prezidenti Şavkat Mirziyoyevə zəng edərək onu doğum günü münasibətilə təbrik edib.

Prezidentin Mətbuat Xidmətinin məlumatına görə, dövlət başçısı Şavkat Mirziyoyevə uzun ömür, möhkəm cansağlığı, qardaş Özbəkistan xalqının firavanlığı naminə həyata keçirdiyi ali dövlət fəaliyyətində yeni uğurlar və nailiyyətlər arzulayıb.

Şavkat Mirziyoyev səmimi təbrikə və xoş arzulara görə İlham Əliyevə təşəkkür edib, Azərbaycan xalqına rifah və firavanlıq diləyib.

Telefon danışığı zamanı tərəflər Azərbaycan-Özbəkistan strateji müttəfiqlik münasibətlərinin əhəmiyyətini vurğulayıb, ikitərəfli əməkdaşlığın bütün istiqamətlər üzrə uğurla inkişaf etdiyini məmnunluqla qeyd ediblər.

Prezidentlər həmçinin gələcək təmaslar və qarşılıqlı maraq doğuran məsələlər, eləcə də ikitərəfli münasibətlərin perspektivləri ətrafında fikir mübadiləsi aparıblar.