XİN: Zaxarovanın Qarabağla bağlı açıqlamaları reallığı təhrif edir

Azərbaycan Xarici İşlər Nazirliyi (XİN) Rusiyanın Xarici İşlər Nazirliyinin sözçüsü Mariya Zaxarovanın keçmiş Ermənistan-Azərbaycan münaqişəsi ilə bağlı son açıqlamalarını reallığın təhrif edilməsi kimi qiymətləndirib.

XİN-in mətbuat katibi Ayxan Hacızadə bildirib ki, Qarabağ bölgəsi beynəlxalq ictimaiyyət, o cümlədən Rusiya tərəfindən hər zaman Azərbaycanın ayrılmaz tərkib hissəsi kimi tanınıb.

"Bu səbəbdən, Kollektiv Təhlükəsizlik Müqaviləsi Təşkilatı (KTMT) mexanizmlərinin 30 il ərzində Ermənistanın işğalı altında saxlanmış Azərbaycanın suveren ərazilərinə münasibətdə tətbiq edilməsi məsələsini davamlı şəkildə gündəmdə saxlamaq cəhdi və bunun Qarabağ bölgəsinin Ermənistan tərəfindən tanınıb-tanınmaması ilə əlaqələndirilməsi Rusiya tərəfinin Azərbaycanın Qarabağ bölgəsi ilə bağlı rəsmi mövqeyinə zidd olmaqla yanaşı, tamamilə əsassızdır", - Hacızadə deyib.

XİN sözçüsünün sözlərinə görə, Azərbaycan öz ərazi bütövlüyünü və suverenliyini beynəlxalq hüquqa uyğun şəkildə bərpa edib və bununla da keçmiş münaqişə başa çatıb.

"Bu çərçivədə, Rusiya-Ermənistan münasibətlərinə aid mövzuların Azərbaycanla əlaqəli şəkildə şərh edilməsi təcrübəsinə son qoyulmalıdır", – o əlavə edib.

Bəyanat Rusiyanın XİN sözçüsü Mariya Zaxarovanın iyulun 27-də "Qvardeysk" gənclər forumunda səsləndirdiyi fikirlərə cavab olaraq verilib. Zaxarova bildirib ki, Ermənistan vaxtilə KTMT mexanizmlərinin işə salınmasına çağırsa da, Qarabağın Ermənistan tərəfindən nə öz ərazisi, nə də müstəqil dövlət kimi tanınmaması səbəbindən təşkilatın kollektiv təhlükəsizlik mexanizmlərinin tətbiqi mümkün olmayıb. Azərbaycan isə 2023-cü ildə keçirdiyi antiterror tədbirlərindən sonra Qarabağ üzərində tam suverenliyini bərpa etdiyini bəyan edib.

Aytac Zeynalova