Azərbaycan Britaniyanın əsas tərədaşıdır - Norman

Azərbaycan Cənubi Qafqazda Böyük Britaniyanın əsas tərəfdaşıdır və bu mövqeyini gələcək illərdə də qoruyacaq. Bunu Böyük Britaniyanın Azərbaycandakı səfiri Dankan Norman bildirib.

“Azərbaycan bu regionda bizim üçün əsas tərəfdaşdır və gələcək illərdə də belə olmağa davam edəcək,”-  Norman deyib.

Onun sözlərinə görə, Cənubi Qafqaz uzun müddətdir Böyük Britaniya üçün strateji əhəmiyyət daşıyır və Londonun regiondakı əsas prioritetləri sülh və rifahdır.

Səfir ötən il Vaşinqton sammitində Azərbaycan və Ermənistan arasında sülh istiqamətində atılan addımları alqışladıqlarını bildirib.

Norman hesab edir ki, davamlı sülh Azərbaycan, Ermənistan və Gürcüstan üçün yeni iqtisadi imkanlar yaradacaq və üç ölkə arasında əlaqələrin genişlənməsinə şərait yaradacaq.

O bildirib ki, Böyük Britaniya-Azərbaycan iqtisadi əməkdaşlığının əsasını enerji sektoru təşkil etsə də, münasibətlər son illərdə digər sahələrə də genişlənib.

“Əvvəlcə neft və qazdan əldə etdiyimiz iqtisadi mənfəətlər indi bir çox başqa sahələrə də şaxələnib,” - Norman deyib.

Səfir əməkdaşlığın bərpa olunan enerji sahəsini də əhatə etdiyini qeyd edərək, BP-nin Cəbrayılda günəş elektrik stansiyasına investisiyasını buna nümunə göstərib.
BP 1994-cü ildə imzalanmış “Əsrin müqaviləsi”ndən etibarən Azərbaycanın neft-qaz sektorunun əsas xarici investorlarından biridir.

Gülnar Nazimqızı