Daşkənddə Prezident İlham Əliyevin rəsmi qarşılanma mərasimi olub - Yenilənib

Avqustun 23-də Daşkənddəki “Kuksaroy” dövlət iqamətgahında Azərbaycan Prezidenti İlham Əliyevin rəsmi qarşılanma mərasimi keçirilib.

Azərbaycanın və Özbəkistanın dövlət bayraqlarının dalğalandığı meydanda İlham Əliyevin şərəfinə fəxri qarovul dəstəsi düzülüb.

Özbəkistan Prezidenti Şavkat Mirziyoyev İlham Əliyevi qarşılayıb.

Azərbaycan və Özbəkistanın dövlət himnləri səsləndirilib, fəxri qarovul dəstəsinin rəisi Azərbaycan Prezidentinə raport verib.

Daha sonra prezidentlər fəxri qarovul dəstəsinin qarşısından keçiblər. Özbəkistanın dövlət və hökumət nümayəndələri İlham Əliyevə, Azərbaycan nümayəndə heyətinin üzvləri isə Şavkat Mirziyoyevə təqdim olunub.

Fəxri qarovul dəstəsi hərbi marşın sədaları altında prezidentlərin qarşısından keçib.

Dövlət başçıları birgə foto çəkdiriblər.

***

Avqustun 23-də Azərbaycan Prezidenti İlham Əliyev və birinci xanım Mehriban Əliyeva Daşkənddə Müstəqillik abidəsini ziyarət ediblər.

İlham Əliyev abidənin önünə əklil qoyub.

Özbəkistanın müstəqilliyinin 30 illiyi münasibətilə ucaldılan abidə “Yangi Uzbekiston” (“Yeni Özbəkistan”) kompleksinin mərkəzində yerləşir.

Abidə Özbəkistan Prezidenti Şavkat Mirziyoyevin tapşırığı ilə layihələndirilib. Onu sülh, azadlıq, xeyirxahlıq və xoşbəxtliyi simvolizə edən, qanadlarını geniş açmış Humay quşunun obrazı tamamlayır.

***

Avqustun 23-də Azərbaycan Respublikasının Prezidenti İlham Əliyev Özbəkistan Respublikasına dövlət səfərinə gedib.

“Daşkənd-Xumo” Beynəlxalq Hava Limanında dövlət başçısının şərəfinə fəxri qarovul dəstəsi düzülüb.

Prezident İlham Əliyevi və birinci xanım Mehriban Əliyevanı Özbəkistan Respublikasının Prezidenti Şavkat Mirziyoyev və xanımı Ziroatxon Mirziyoyeva qarşılayıblar.