Pezeşkian İlham Əliyevə dəstəyə görə təşəkkür edib

İran Prezidenti Məsud Pezeşkian ölkəsinin üzləşdiyi çətin vəziyyətdə Azərbaycan Prezidenti İlham Əliyevin göstərdiyi dəstəyə görə təşəkkür edib.

Pezeşkian bunu avqustun 31-də Qırğızıstanın paytaxtı Bişkekdə İlham Əliyevlə görüşündə deyib.

Pezeşkian İlham Əliyevlə görüşlərini və telefon danışıqlarını müsbət xatırladığını bildirib. O, Azərbaycanın mövqeyinin, göstərdiyi dəstəyin, başsağlığının və İrana göndərdiyi humanitar yardımın İran dövləti və xalqı tərəfindən yüksək qiymətləndirildiyini deyib.

İran prezidenti iki ölkə arasında əlaqələrin inkişafı üçün yaxşı imkanların olduğunu və Tehranının Azərbaycanla bütün sahələrdə münasibətləri genişləndirməkdə maraqlı olduğunu bildirib.

Pezeşkian Azərbaycan-İran münasibətlərinin dostluq və qardaşlıq xarakteri daşıdığını vurğulayıb və İranın bütün qonşu ölkələrlə yaxşı münasibətlər qurmaq niyyətində olduğunu qeyd edib.