Qarabağ və Şərqi Zəngəzurda əhali sayı 90 mini ötüb

Azərbaycan ərazisinin 13%-dən çoxu mina və partlamamış hərbi sursatlarla çirklənib. Bu barədə Prezident İlham Əliyevin Bakıda BMT ilə birgə təşkil olunan IV Beynəlxalq Minatəmizləmə Konfransının iştirakçılarına ünvanladığı müraciətdə bildirilib. Müraciəti Prezidentin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev oxuyub.

Dövlət başçısının müraciətində qeyd olunub ki, 2020-ci il Vətən müharibəsi başa çatdıqdan bəri 437 vətəndaş mina partlayışlarının qurbanı olub, nəticədə 76 nəfər həlak olub, 361 nəfər ağır yaralanıb. Ümumilikdə isə münaqişə dövründə 3 500-dən çox insan mina terrorundan zərər çəkib. Ermənistanın təqdim etdiyi mina xəritələrinin qeyri-dəqiq və natamam olmasına baxmayaraq, genişmiqyaslı əməliyyatlar nəticəsində 260 mindən çox mina və partlamamış sursat zərərsizləşdirilib.

Müraciətdə vurğulanıb ki, "Böyük Qayıdış" proqramı çərçivəsində artıq 40 minə yaxın keçmiş məcburi köçkün doğma yurduna qayıdıb, Qarabağ və Şərqi Zəngəzurda daimi yaşayan əhalinin ümumi sayı isə 90 min nəfəri keçib. Azərbaycanın humanitar minatəmizləməni 18-ci milli Dayanıqlı İnkişaf Məqsədi (DİM) elan etdiyini diqqətə çatdıran dövlət başçısı beynəlxalq birliyi maliyyə və texnoloji dəstəyi gücləndirməyə çağırıb.

N.Təbrizli