UN-Habitat: Qarabağ və Şərqi Zəngəzurda bərpa olunan enerji üçün böyük investisiya potensialı var

Qarabağ və Şərqi Zəngəzurda bərpa olunan enerji sahəsinə investisiya qoyuluşu üçün böyük potensial mövcuddur və bu, regionun dayanıqlı bərpasında mühüm rol oynaya bilər.

Bunu BMT-nin Məskunlaşma Proqramının (UN-Habitat) Şərqi Avropa və Mərkəzi Asiya üzrə Regional Ofisinin direktoru Erfan Ali Bakıda keçirilən IV Beynəlxalq Minatəmizləmə Konfransında bildirib.

“Regionda bərpa olunan enerjiyə investisiya qoyuluşu potensialı böyükdür və çox perspektivlidir”, - Ali deyib.

Onun sözlərinə görə, Azərbaycan hökuməti artıq bu istiqamətdə böyük investisiyaları nəzərdən keçirir və bu planlar nəqliyyat, inkişaf və enerji dəhlizlərinin yaradılması üzrə regional strateji baxışla uzlaşır.

Ali bildirib ki, Qarabağ və Şərqi Zəngəzurda minatəmizləmə işləri şəhərlərin sonrakı bərpasının planlaşdırılması üçün əsas şərtdir.

“Minatəmizləmə fəaliyyəti istənilən münaqişə və ya münaqişədən sonrakı şəraitdə şəhərlərin bərpasına başlamaq üçün təməl daşıdır”, - o deyib.

Onun sözlərinə görə, ərazilərin təhlükəsiz hala gətirilməsi mənzillərin, yolların, xəstəxanaların, məktəblərin, ictimai obyektlərin və digər əsas xidmətlərin bərpasına və yenidən qurulmasına imkan verir.

Ali həmçinin bildirib ki, enerji infrastrukturu Azərbaycanın Böyük Qayıdış proqramı çərçivəsində əhalinin geri qayıdışının və dayanıqlı şəhər bərpasının təmin olunması üçün vacibdir. Onun sözlərinə görə, “daha yaxşısını yenidən qurmaq” prinsipi bərpa olunan enerji və dayanıqlılıq meyarlarının bərpa prosesinə daxil edilməsini tələb edir.

O əlavə edib ki, Qarabağda həyata keçirilən bərpa və infrastruktur planları Mərkəzi Asiya və Asiyanı Azərbaycan üzərindən Avropa ilə birləşdirən Orta Dəhlizin inkişafı ilə də uzlaşır.

Gülnar Nazimqızı