Türkiyə Hörmüz boğazında müharibədən əvvəlki status-kvonun bərpasına çağırır - Fidan

Türkiyə Hörmüz boğazında təhlükəsiz və fasiləsiz keçidin təmin edilməsinə, həmçinin müharibədən əvvəlki status-kvonun bərpasına çağırır. Bunu Türkiyənin xarici işlər naziri Hakan Fidan bazar ertəsi Bakıda bildirib.

“Son dövrdə artan qarşılıqlı hücumlar sülh səylərinə ciddi zərbə vurur. Regionda gərginliyi artıran bu əməllərə dərhal son verilməlidir”, - Fidan azərbaycanlı həmkarı Ceyhun Bayramovla birgə mətbuat konfransında deyib.

Onun sözlərinə görə, İranın təhlükəsizliyi, sabitliyi və rifahı bütün regiona birbaşa təsir göstərir və mövcud münaqişə diplomatik yollarla həll edilməlidir.

Fidan bildirib ki, Türkiyə böhranın həlli və regionda təhlükəsizliyin təmin olunması məqsədilə bütün tərəflərlə təmaslarını davam etdirir.

Nazirlər, həmçinin Rusiya-Ukrayna müharibəsini və onun regiona təsirlərini müzakirə ediblər.
Fidanın sözlərinə görə, son aylarda Qara dənizdə mülki gəmilərə hücumların artması insanların həyatı, gəmiçilik və ətraf mühit üçün ciddi təhlükə yaradır. O əlavə edib ki, bu hücumlar nəticəsində Türkiyə və Azərbaycan dənizçiləri də həlak olublar.

“Müharibənin Qara dənizə yayılması, vətəndaşlarımızın həyatını və şirkətlərimizin fəaliyyətini təhdid etməsi qəbuledilməzdir”, – Fidan deyib.

Nazir Türkiyənin tərəflərə lazımi xəbərdarlıqları etdiyini və Qara dənizdə təhlükəsizliyin təmin olunmasına dair razılaşma əldə edilməsi üçün səylərini artırdığını bildirib.

“Türkiyə sülh üçün bütün səylərini davam etdirəcək”, - o əlavə edib.

Gülnar Nazimqızı