Azərbaycan və Türkiyə Afrika ölkələrində birgə layihələr həyata keçirməyi planlaşdırır - Bayramov

Azərbaycan və Türkiyə Afrika ölkələrində birgə layihələrin həyata keçirilməsini əməkdaşlığın yeni istiqamətlərindən biri kimi nəzərdən keçirirlər. Bunu Azərbaycanın xarici işlər naziri Ceyhun Bayramov bazar ertəsi bildirib.

“Azərbaycan son illərdə Afrika ölkələri ilə əlaqələri prioritet istiqamətlərdən biri kimi müəyyən edib. Ticarət-iqtisadi missiyaların və həyata keçirilən layihələrin sayı artır”, - Bayramov Türkiyənin xarici işlər naziri Hakan Fidanla birgə mətbuat konfransında deyib.

Onun sözlərinə görə, Türkiyənin Afrikada geniş diplomatik və iqtisadi təmsilçiliyə malik olması Azərbaycan, Türkiyə və Afrika ölkələrinin iştirakı ilə üçtərəfli layihələrin reallaşdırılması üçün imkan yaradır.

Bayramov bildirib ki, iki ölkə iqtisadiyyat, investisiya, ticarət, müdafiə, təhlükəsizlik, humanitar sahə və alternativ enerji daxil olmaqla geniş istiqamətlər üzrə əməkdaşlıq edir, həmçinin üçüncü ölkələrdə birgə fəaliyyət göstərir.

Nazirin sözlərinə görə, Azərbaycan-Türkiyə Hökumətlərarası Komissiyasının 2023-cü ilin dekabrında keçirilmiş iclasının yekununda iqtisadi əməkdaşlıq üzrə 110 tədbir və layihəni əhatə edən Yol Xəritəsi qəbul olunub və hazırda onun icrası davam edir.

Gülnar Nazimqızı