Azərbaycan tranzit yükdaşımalarını ən azı 56% artırmağı planlaşdırır

Azərbaycan Şərq-Qərb və Şimal-Cənub dəhlizləri üzrə tranzit yükdaşımaların həcmini bu il gözlənilən 16 milyon tondan 2030-cu ilədək ən azı 25 milyon tona çatdırmağı planlaşdırır. Bu, təxminən 56% artım deməkdir. Bu barədə Azərbaycan Prezidenti İlham Əliyev Bakıda keçirilən II Azərbaycan Beynəlxalq İnvestisiya Forumunda çıxışı zamanı bildirib.

“Bu il göstərici 16 milyon tona çatacaq. Hədəfimiz 2030-cu ilədək hər iki marşrut üzrə 25 milyon tona, bəlkə də daha çoxuna çatmaqdır”, - Əliyev deyib.

Onun sözlərinə görə, artan tranzit tələbatını qarşılamaq üçün Azərbaycan qonşu ölkələrlə nəqliyyat imkanlarının genişləndirilməsi, gömrük inzibatçılığının rəqəmsallaşdırılması və multimodal daşımaların səmərəliliyinin artırılması üzərində işləyir.

Prezident bildirib ki, Azərbaycan dəmir yollarının 60%-i elektrikləşdirilib və proses davam edir.

Ölkənin bütün qonşu dövlətlərlə dəmir yolu əlaqəsi mövcuddur.
Əliyevin sözlərinə görə, Azərbaycan Şərq-Qərb və Şimal-Cənub nəqliyyat dəhlizlərinin hər ikisində fəal iştirak edən azsaylı ölkələrdəndir.

Gülnar Nazimqızı