Azərbaycan data mərkəzləri üzrə aparıcı şirkətlərlə fəal danışıqlar aparır - Əliyev

Azərbaycan məlumat mərkəzləri və süni intellekt infrastrukturunun inkişafı üzrə dünyanın aparıcı şirkətləri ilə danışıqların fəal mərhələsindədir. Bu barədə Azərbaycan Prezidenti İlham Əliyev onun himayəsi altında Bakıda keçirilən II Azərbaycan Beynəlxalq İnvestisiya Forumu çərçivəsində təşkil olunan "Parçalanmış dünyada etimadın bərpası: Cənubi Qafqaz qlobal bağlantı və investisiya sabitliyinin dayağı kimi" mövzusuna dair tədbirdə bildirib.

“Bu üstünlük rəqəmsal inkişaf, məlumat mərkəzləri və süni intellektin inkişafı üçün istifadə olunacaq. Biz artıq dünyanın aparıcı şirkətləri ilə danışıqların çox fəal mərhələsindəyik. Bu, demək olar ki, ikinci prioritetdir”, - Əliyev deyib.

Onun sözlərinə görə, Azərbaycanın enerji ehtiyatlarının və istehsal güclərinin mövcudluğu enerji çatışmazlığı ilə üzləşən regionda məlumat mərkəzlərinin yaradılması üçün rəqabət üstünlüyü təmin edir.

Prezident bildirib ki, Azərbaycanda artıq 200 meqavatlıq enerji saxlama gücü mövcuddur və bu imkanların daha da genişləndirilməsi planlaşdırılır. Bərpa olunan enerji strategiyası elektrik enerjisinin istehsalı ilə yanaşı, onun ötürülməsi və saxlanması sistemlərini də əhatə edir.

Azərbaycan elektrik enerjisinin Avropa və Türkiyə bazarlarına ixracını genişləndirməyi planlaşdırır.
Əliyev həmçinin bildirib ki, “Abşeron” qaz yatağının növbəti mərhələlərinin işlənilməsinə dair imzalanmış müqavilələr Azərbaycanın qaz hasilatını illik beş milyard kubmetrədək artıracaq.

Müvafiq sazişlər bu il Bakı Enerji Həftəsi çərçivəsində imzalanıb.
Prezidentin sözlərinə görə, neft-qaz sektoru investisiyaların həcminə görə Azərbaycan iqtisadiyyatının ən böyük seqmenti olaraq qalacaq.

Gülnar Nazimqızı