Şahin Mustafayev İranın yol və şəhərsalma naziri ilə görüşüb

Azərbaycan Baş nazirinin müavini Şahin Mustafayevin rəhbərlik etdiyi nümayəndə heyətinin İrana səfəri çərçivəsində Azərbaycan-İran iqtisadi, ticarət və humanitar sahələrdə əməkdaşlıq üzrə Dövlət Komissiyasının həmsədrlərinin görüşü keçirilib.

Görüşdə iqtisadi-ticarət, nəqliyyat-kommunikasiya və humanitar sahələrdə əməkdaşlığın vəziyyəti və inkişaf perspektivləri müzakirə olunub.

Tərəflər bu ilin fevralında Bakıda keçirilən Dövlət Komissiyasının 17-ci iclasının yekunları üzrə əldə olunmuş razılaşmaların, həmçinin imzalanmış Anlaşma Memorandumunda nəzərdə tutulan tədbirlərin icra vəziyyətini nəzərdən keçiriblər.

Şahin Mustafayev Azərbaycan Prezidenti İlham Əliyev və İran Prezidenti Məsud Pezeşkian arasında siyasi dialoqun və dostluq münasibətlərinin ikitərəfli əlaqələrin inkişafına töhfə verdiyini bildirib.

Görüşdə “Şimal-Cənub” Beynəlxalq Nəqliyyat Dəhlizinin inkişafı və onun ötürücülük qabiliyyətinin artırılması məsələləri də müzakirə edilib.

Ağbənd–Kəlalə avtomobil körpüsünün tikintisinin başa çatdırılması qeyd olunub, sərhəd-keçid infrastrukturunun istifadəyə verilməsi ilə bağlı məsələlər nəzərdən keçirilib.

Bundan başqa, Astara yük terminalında işlərin tamamlanması və terminalın yükaşırma imkanlarının genişləndirilməsi ilə bağlı görülən tədbirlər müzakirə olunub.

Tərəflər Azərbaycan-İran əməkdaşlığının inkişaf etdirilməsi, Dövlət Komissiyasının 17-ci iclasında əldə edilmiş razılaşmaların icrasının davam etdirilməsi və birgə layihələrin həyata keçirilməsinin sürətləndirilməsi barədə razılığa gəliblər.