Qara dənizdə Azərbaycan vətəndaşlarının olduğu yük gəmisi dron hücumuna məruz qalıb - XİN

Qara dənizdə, Rumıniya sahilləri yaxınlığında “Royad Məmmədov” adlı xarici yük gəmisinə dron hücumu nəticəsində Azərbaycanın bir vətəndaşı həlak olub, daha biri itkin düşüb. Bu barədə Xarici İşlər Nazirliyi məlumat yayıb. 

Həlak olan şəxs gəminin kapitanı, 1974-cü il təvəllüdlü Həsənov Rüstəm İsmayıl oğludur.

2002-ci il təvəllüdlü Süleymanzadə Məhəmməd Həmzə oğlu isə itkin düşüb. Hazırda onun axtarışı aparılır.

Gəminin heyətində olan digər Azərbaycan vətəndaşları xilas edilib. Onlardan üçü xəstəxanaya yerləşdirilib.

XİN bildirib ki, hadisə ilə bağlı Azərbaycanın diplomatik nümayəndəlikləri və aidiyyəti ölkələrin səlahiyyətli qurumları ilə koordinasiya işləri aparılır.

Xilas edilən vətəndaşlara zəruri tibbi və konsulluq dəstəyinin göstərilməsi, həlak olan şəxsin cənazəsinin Azərbaycana gətirilməsi ilə bağlı müvafiq prosedurların həyata keçirilməsi istiqamətində tədbirlər görülür.

Nazirlik həlak olan şəxsin ailə və yaxınlarına başsağlığı verib, xəsarət alanların tezliklə sağalmasını arzulayıb.

XİN Azərbaycan vətəndaşlarını hərbi əməliyyatların getdiyi və təhlükəsizlik vəziyyətinin qeyri-sabit olduğu bölgələrə səfər etməkdən, həmçinin belə ərazilərdə və riskli marşrutlarda hərəkət edən nəqliyyat vasitələrində, xüsusilə gəmilərdə işləməkdən çəkinməyə çağırıb.

Hadisə 5 oktyabr 2026-cı ildə Qara dənizdə, Rumıniyanın eksklüziv iqtisadi zonasında, Sfântu Gheorghe burnundan təxminən 30 dəniz mili (55 km) cənubda, Pescaruș dəniz neft platformasının yaxınlığında baş verib. Gəmi Rumıniyanın ərazi sularından kənarda olub.

“Royad Mammadov” gəmisi taxıl daşıyırdı və Ukraynanın İzmail limanından İtaliyanın Ravenna limanına doğru hərəkət edirdi. Gəmi Sent-Kits və Nevis bayrağı altında üzürdü.

Rumıniya rəsmiləri gəmidə yanğın baş verdiyini və 11 heyət üzvünün xilas edildiyini açıqlayıb. Hadisənin səbəbi ilə bağlı Rumıniya tərəfi ilkin olaraq rəsmi açıqlama verməyib. Ukrayna Prezidenti Volodimir Zelenski isə gəminin iki Rusiya dronu tərəfindən vurulduğunu bildirib.

Gülnar Nazimqızı