Mustafayev Rusiyada Rusiya rəsmiləri və işgüzar dairələrin nümayəndələri ilə görüşüb

Azərbaycanın Baş nazirinin müavini Şahin Mustafayev Rusiyaya səfəri çərçivəsində Rusiya Baş nazirinin müavinləri Aleksey Overçuk və Aleksandr Novak, həmçinin Azərbaycan-Rusiya və Rusiya-Azərbaycan İşgüzar Şuralarının rəhbərləri Emin Ağalarov və Aleksey Repiklə görüşüb. Bu barədə Nazirlər Kabinetindən bildirilib. 

Şahin Mustafayevin Aleksey Overçukla görüşündə Azərbaycan-Rusiya ticarət-iqtisadi və investisiya əməkdaşlığının inkişaf perspektivləri müzakirə olunub.

Tərəflər sənaye, energetika, kənd təsərrüfatı, nəqliyyat və logistika sahələrində əməkdaşlığın genişləndirilməsi, qarşılıqlı ticarət dövriyyəsinin artırılması məsələlərini nəzərdən keçiriblər.

Görüşdə yüksək səviyyədə əldə olunmuş razılaşmaların, həmçinin Azərbaycan-Rusiya iqtisadi əməkdaşlığı üzrə Hökumətlərarası Komissiyanın aprelin 16-da Zəngilanda keçirilmiş 24-cü iclasında qəbul edilən qərarların icra vəziyyəti də müzakirə olunub.

Nəqliyyat və logistika məsələləri də görüşün gündəliyində yer alıb. Tərəflər “Şimal-Cənub” Beynəlxalq Nəqliyyat Dəhlizinin potensialından daha geniş istifadə imkanlarını, həmçinin sərhəd-buraxılış məntəqələrində yük və nəqliyyat vasitələrinin keçid prosedurlarının təkmilləşdirilməsini müzakirə ediblər.

Şahin Mustafayev Aleksandr Novakla görüşündə də Azərbaycan-Rusiya münasibətlərinin hazırkı vəziyyəti və perspektivləri, o cümlədən sənaye, energetika, nəqliyyat və logistika sahələrində əməkdaşlıq məsələlərini müzakirə edib.

 Baş nazirin müavini Azərbaycan-Rusiya İşgüzar Şurasının İdarə Heyətinin sədri Emin Ağalarov və Rusiya-Azərbaycan İşgüzar Şurasının sədri Aleksey Repiklə görüşüb. Görüşdə iqtisadi-ticari və investisiya əlaqələrinin inkişafı ətrafında fikir mübadiləsi aparılıb.

Azərbaycan-Rusiya iqtisadi əməkdaşlığı üzrə Hökumətlərarası Komissiyanın 24-cü iclası 16 aprel 2026-cı ildə Zəngilanda keçirilib. Həmin iclasda ticarət dövriyyəsinin artırılması, sənaye kooperasiyası, nəqliyyat-logistika, energetika və kənd təsərrüfatı sahələrində əməkdaşlığın genişləndirilməsi məsələləri müzakirə olunub.

Gülnar Nazimqızı