Əliyev və Sərdar Berdiməhəmmədov arasında görüş keçirilib

Azərbaycan Prezidenti İlham Əliyev və Türkmənistan Prezidenti Sərdar Berdiməhəmmədov iki ölkə arasında siyasi, iqtisadi, nəqliyyat, tranzit və logistika sahələrində əməkdaşlığın genişləndirilməsi məsələlərini müzakirə ediblər.

Görüş oktyabrın 8-də Türkmənistanın Türkmənbaşı şəhərində keçirilib.

Söhbət zamanı Azərbaycan Prezidentinin Türkmənistana, Türkmənistan Prezidenti Sərdar Berdiməhəmmədovun və Türkmənistan Xalq Məsləhətinin sədri Qurbanqulu Berdiməhəmmədovun Azərbaycana, o cümlədən Qarabağa səfərləri məmnunluqla xatırlanıb. Bu səfərlərin ikitərəfli münasibətlərin inkişafında mühüm rol oynadığı bildirilib.

Qeyd olunub ki, ötən ildən etibarən Azərbaycan və Türkmənistan arasında ən yüksək səviyyədə beş səfərin həyata keçirilməsi siyasi dialoqun intensivliyini və qarşılıqlı əlaqələrin dinamikasını göstərir.

Görüşdə Azərbaycan-Türkmənistan dostluq və qardaşlıq münasibətlərinin son illərdə dinamik inkişaf etdiyi vurğulanıb. Tərəflər mədəni və humanitar əməkdaşlıq, Xəzər dənizi məsələləri və beynəlxalq təşkilatlar çərçivəsində qarşılıqlı fəaliyyət barədə də fikir mübadiləsi aparıblar.

Azərbaycan və Mərkəzi Asiya Dövlət Başçılarının 8-ci Məşvərət görüşünün Azərbaycanla region dövlətləri arasında tərəfdaşlığın möhkəmləndirilməsi və regional əməkdaşlığın genişləndirilməsi baxımından əhəmiyyəti qeyd olunub.

İlham Əliyev tədbirin yüksək səviyyədə təşkilinə görə təşəkkürünü bildirib.

Dövlət başçısı Azərbaycanın ötən ilin noyabrında Mərkəzi Asiya Dövlət Başçılarının Məşvərət görüşləri formatına tamhüquqlu üzv qəbul edilməsini də xatırladıb və bu təşəbbüsü irəli sürən Qurbanqulu Berdiməhəmmədova minnətdarlığını ifadə edib.

Tərəflər ikitərəfli əməkdaşlığın inkişaf perspektivləri və qarşılıqlı maraq doğuran digər məsələləri də müzakirə ediblər.