Azərbaycan Prezidenti İlham Əliyev İranın daxili işlər naziri İsgəndər Momeni ilə görüşdə təhlükəsizlik və ictimai asayişin qorunması sahələrində əməkdaşlığın vacibliyini vurğulayıb. Bu barədə Azərbaycan Prezidentinin Mətbuat Xidməti məlumat yayıb.

Görüşdə İlham Əliyev İran Daxili İşlər Nazirliyinin nümayəndə heyətinin Azərbaycana səfərinin ikitərəfli təmasların davamı olduğunu bildirib. O, bir müddət əvvəl Azərbaycan nümayəndə heyətinin İrana səfər etdiyini və orada mühüm görüşlər keçirdiyini xatırladıb.

İsgəndər Momeni İran Prezidenti Məsud Pezeşkianın salamlarını İlham Əliyevə çatdırıb. O, Azərbaycanı İran üçün dost və qardaş ölkə adlandıraraq, İranda baş vermiş müxtəlif hadisələr, o cümlədən güclü zəlzələlər və meşə yanğınları zamanı Azərbaycanın göstərdiyi humanitar yardıma görə təşəkkür edib.

İranın daxili işlər naziri, həmçinin regionda gərginliyin aradan qaldırılması istiqamətində aparılan danışıqlar prosesi barədə Azərbaycan Prezidentinə məlumat verib.

İlham Əliyev Yaxın Şərqdəki gərginliyin danışıqlar yolu ilə həll olunacağına ümidvar olduğunu bildirib.

Görüşdə iki ölkənin müvafiq qurumları arasında əməkdaşlığın perspektivləri və qarşılıqlı maraq doğuran digər məsələlər də müzakirə edilib.