Azərbaycan və İran narkotiklərin qanunsuz dövriyyəsi və terrorçuluqla mübarizəni müzakirə edib

Azərbaycan və İranın daxili işlər nazirləri Vilayət Eyvazov və İskəndər Momeni iki ölkənin hüquq-mühafizə orqanları arasında əməkdaşlığın genişləndirilməsi, narkotiklərin qanunsuz dövriyyəsi, beynəlxalq terrorçuluq və digər transmilli cinayətlərlə mübarizə məsələlərini müzakirə ediblər. Bu barədə Azərbaycan Daxili İşlər Nazirliyi məlumat yayıb.

Bildirilib ki, İskəndər Momeninin rəhbərlik etdiyi İran nümayəndə heyəti Azərbaycana səfərə gəlib. Nümayəndə heyəti əvvəlcə Fəxri xiyabanı ziyarət edərək Ümummilli Lider Heydər Əliyevin və akademik Zərifə Əliyevanın xatirəsini yad edib, daha sonra Şəhidlər xiyabanında olub.

Vilayət Eyvazov görüşdə narkotiklərin qanunsuz dövriyyəsi, beynəlxalq terrorçuluq, insan alveri, qanunsuz miqrasiya və kibercinayətkarlıqla mübarizənin birgə səylər tələb etdiyini bildirib.

Nazir Azərbaycanın hüquq-mühafizə orqanlarının mütəşəkkil cinayətkarlıq, ekstremizm, separatizm və narkotik vasitələrin qanunsuz dövriyyəsinə qarşı kompleks tədbirlər həyata keçirdiyini qeyd edib. O, iki ölkənin daxili işlər orqanları arasında əməkdaşlığın yeni istiqamətlərinin müəyyənləşdirilməsində və əlaqələrin genişləndirilməsində Azərbaycanın maraqlı olduğunu vurğulayıb.

İskəndər Momeni isə məlumat və təcrübə mübadiləsinin regional təhlükəsizliyə müsbət təsir göstərəcəyini bildirib. O, İranın hüquq-mühafizə orqanlarının azərbaycanlı həmkarları ilə əməkdaşlığın daha da dərinləşdirilməsinə önəm verdiyini deyib.

Görüşdə İranın Azərbaycandakı səfiri Müctəba Dəmirçilu da iştirak edib.