Rusiya AQEM çərçivəsində informasiya-kommunikasiya texnologiyalarına dair strategiya hazırlayıb

Rusiya 2026–2028-ci illəri əhatə edən, AQEM çərçivəsində informasiya-kommunikasiya texnologiyalarından istifadəyə dair strategiya layihəsi hazırlayıb. Rusiyanın xarici işlər naziri Sergey Lavrov bunu AQEM-in sammitində çıxışı zamanı deyib.

O bildirib ki, Moskva təşkilat çərçivəsində informasiya-kommunikasiya sahəsində dialoqun genişləndirilməsini dəstəkləyir. Lavrovun sözlərinə görə, Rusiya kiçik və orta sahibkarlığa dəstək üzrə növbəti ikiillik strategiya da hazırlayıb. Bu sahədə əməkdaşlığın istiqamətlərindən biri kiçik və orta müəssisələrin iri şirkətlərin təchizat zəncirlərinə cəlb edilməsidir.

Lavrov AQEM-in Avrasiya qitəsində əməkdaşlıq və inkişaf üçün təbii platforma olduğunu bildirib. O, Rusiya və Qazaxıstanın 2022-ci ildə humanitar istiqamətin, o cümlədən sülhməramlılıq və sülh quruculuğu sahələrində əməkdaşlığın genişləndirilməsini təklif etdiyini deyib.

Nazir idman sahəsində də əməkdaşlığa çağırıb və AQEM Katibliyini gələn həftə Krasnoyarskda keçiriləcək “Rusiya - idman ölkəsi” festivalında iştiraka dəvət edib. O, elmi mübadilə və dağlıq ərazilərdə təhlükəsizlik məsələlərini də təşkilatın əməkdaşlıq istiqamətləri sırasında göstərib.

Gülnar Nazimqızı