Milli Məclis: Azərbaycana qarşı hibrid hücumlar dini təxribat və kiberhücumlarla aparılır

Milli Məclisin Xarici müdaxilələrə və hibrid təhdidlərə qarşı müvəqqəti komissiyası Azərbaycana qarşı dini-ideoloji təxribatların, əlaqələndirilmiş informasiya əməliyyatlarının və kiberhücumların sinxron şəkildə həyata keçirildiyini bəyan edib. Bu barədə komissiyanın yaydığı bəyanatda bildirilib.

Qeyd olunub ki, aidiyyəti dövlət orqanları ilə birgə araşdırmalar zamanı ictimai rəyi manipulyasiya etməyə, cəmiyyətdə qütbləşmə yaratmağa və dövlət qurumlarına etimadı sarsıtmağa yönələn fəaliyyətlərin ölkə daxilində və xaricindəki təsir agentləri, gizli təşkilatlar, haker qrupları, xarici media quruluşları, real və saxta hesablar, eləcə də botlar vasitəsilə aparıldığı müəyyən edilib.

Bəyanatda vurğulanıb ki, dezinformasiya məzmunları müstəqil görünən kanallar vasitəsilə rəqəmsal platformalara yerləşdirilir, cəmiyyətdə etnik, dini və siyasi zəmində parçalanma yaratmağa cəhd göstərilir.

Komissiya bildirib ki, bu fəaliyyətlər çərçivəsində sosial şəbəkə alqoritmlərindən istifadə etməklə insanlara mövcud baxışlarını dəstəkləyən saxta məlumatlar təqdim edilir. Bəyanatda belə mexanizmlərin ictimai rəyi manipulyasiya etmək və cəmiyyətdə qütbləşməni dərinləşdirmək məqsədi daşıdığı qeyd olunub.

Sənəddə Azərbaycana qarşı hibrid hücumların miqyasının artması ölkənin beynəlxalq nüfuzunun yüksəlməsi, enerji təhlükəsizliyinə verdiyi töhfə, regional tranzit dəhlizlərindəki strateji əhəmiyyəti və ölkədaxili siyasi-iqtisadi sabitliyi ilə əlaqələndirilib.

Komissiya, həmçinin monitorinqlər zamanı cəmiyyətin təxribatlara uymadığının, dövlətin atdığı addımları dəstəklədiyinin və bölücü məzmunların ifşasına kömək göstərdiyinin müəyyən edildiyini bildirib.

Bəyanatda qeyd olunub ki, Milli Məclisin müvafiq komissiyası, aidiyyəti komitələr və dövlət qurumları hibrid hücumların qarşısını almaq istiqamətində fəaliyyətlərini davam etdirəcəklər. Komissiya Azərbaycan əleyhinə fəaliyyətləri qınayan dost və qonşu ölkələrin vətəndaşlarına da təşəkkür edib.